Fem til Landsfinalen

NMK Vikedal stiller med fem deltakerar på årets Landsfinale for bilcross junior som går i Aurdal i Valdres komande lørdag.

Over 100 deltakerar frå heile landet skal kjempa om å bli den uoffisielle norgesmesteren i bilcross junior.
For å kunna delta i Landsfinalen må ein kvalifisera seg ved å vera blant dei 6 beste i eit av dei 40 kvalifiseringsløpa som har blitt arrangert rundt heile landet frå Kvinesdal i sør til Bardu i nord. Dei fem frå NMK Vikedal som skal delta er Gisle Flatraaker Aarbø (Fitjar), Andrè Hustoft Nesheim (Skjold), Sondre Hundseid Eikeland (Øvre Vats), Gøran Spartveit (bilde – Øvre Vats) og Sindre Vikedal (Vikedal). Så langt i sesongen er det Gøran Spartveit som har gjort det best med sin sjeldne Ford Taunus. To førsteplassar, ein andreplass og ein sjetteplass er resultata i Vestlandsmesterskapet så langt, og han leiar dermed klart før haustsesongen startar. Sjetteplassen var forøvrig resultatet av eit solid bakakselhavari. Sondre Hundseid Eikeland vann VM-runden på heimebane, som og var kvalifiseringsløp til Landsfinalen, og ligg på tredjeplass i VM. Sindre Vikedal, Andrè Hustoft Nesheim og Gisle Flatraaker Aarbø kom på dei neste plassane i kvalifiseringsløpet, og er no klar til innsats saman med dei to andre på Sundvold Motorbane i Valdres.

NMK Vikedal
Landsfinalen